Ishni boshlash

Bu sahifada ilovaga birinchi marta kirishdan biznes sozlamalarigacha boʻlgan hamma narsa bor.

Roʻyxatdan oʻtish

Biznesni bitta odam yaratadi — u biznesning Egasi boʻladi. Xodimlarni keyin qoʻshasiz.

1. Telefoningiz brauzerida app.ijarachi.app sahifasini oching.
2. Birinchi marta kirganingizda Tilni tanlang ekrani chiqadi. Tilni tanlab, Davom etish tugmasini bosing.
3. Kirish ekranida Roʻyxatdan oʻtish havolasini bosing.
4. Maydonlarni toʻldiring:
   • Biznes nomi — masalan, "Qurilish Ijara";
   • Ismingiz;
   • Telefon raqam;
   • Parol — kamida 6 belgi.
5. Qaysi yoʻnalishlarda ishlaysiz boʻlimida kerakli yoʻnalishlarni belgilang: Qurilish, Toʻy va tadbir, Kiyim, Avtomobil, Koʻchmas mulk. Kamida bittasini tanlang.
6. Biznesni yaratish tugmasini bosing.

Tanlangan yoʻnalishlarga qarab ilova mahsulot kategoriyalarini oʻzi tayyorlaydi — ular ekranda "Avtomatik kategoriyalar" qatorida koʻrinadi. Kategoriyalarni keyin oʻzgartirish mumkin: Kategoriyalar.

Diqqat

Bitta telefon raqam bitta hisobga tegishli. Agar "Bu raqam allaqachon roʻyxatdan oʻtgan. Kirish sahifasidan kiring" xabari chiqsa, roʻyxatdan oʻtmang — Kirish orqali kiring.

Kirish

1. Telefon raqam va Parol maydonlarini toʻldiring. Parolni koʻrish uchun koʻz belgisini bosing.
2. Kirish tugmasini bosing.

Agar "Telefon raqam yoki parol notoʻgʻri" chiqsa, raqam va parolni qayta tekshiring. "Hisobingiz oʻchirilgan. Biznes egasi bilan bogʻlaning" chiqsa, egangiz sizni oʻchirib qoʻygan. Boshqa holatlar: Koʻp beriladigan savollar.

Tilni oʻzgartirish

Ilova uch tilda ishlaydi: Oʻzbekcha, Русский, English. Tilni istalgan vaqt almashtirish mumkin:

1. Pastdagi Menyu tugmasini bosing.
2. Til qatorini bosing.
3. Kerakli tilni tanlang.

Kirish ekranida ham til tugmasi bor.

Telefoningizning bosh ekraniga qoʻshing

Ilovani oddiy dastur kabi bir bosishda ochish uchun uni bosh ekranga qoʻshing. Buni brauzer qiladi, ilova emas:

• iPhone (Safari): "Ulashish" tugmasini bosing, soʻng "Bosh ekranga" ni tanlang.
• Android (Chrome): brauzer menyusini (uch nuqta) oching, soʻng "Bosh ekranga qoʻshish" ni tanlang.

Brauzer menyusidagi soʻzlar telefoningiz tiliga qarab farq qilishi mumkin.

Profilingiz

Ismingiz, telefon raqamingiz, parolingiz va rasmingizni Profil sahifasida oʻzgartirasiz.

1. Menyu ni oching va eng yuqoridagi shaxsiy kartangizni (ismingiz va telefoningiz yozilgan) bosing.
2. Kerakli maydonlarni oʻzgartiring:
   • Profil rasmi — rasm menyuda va bosh sahifada koʻrinadi. Rasm turi: JPG, PNG yoki WebP, 5 MB gacha. Rasmni oʻchirish uchun Olib tashlash ni bosing;
   • Ism familiya;
   • Telefon raqam;
   • Yangi parol — oʻzgartirmoqchi boʻlmasangiz, boʻsh qoldiring. Parol kamida 6 belgi boʻlsin.
3. Saqlash tugmasini bosing.

Ilovadan chiqish. Profil sahifasining yuqori oʻng burchagidagi qizil belgini bosing. "Chiqasizmi?" deb soʻraydi: Chiqish — chiqish, Yoʻq — qolish. Qayta kirish uchun telefon raqam va parol kerak boʻladi.

Kompaniya maʼlumotlari Faqat egasi

1. Menyu ni oching va yuqoridagi kompaniya kartasini (biznes nomi va logotipi bor) bosing.
2. Kompaniya sahifasida oʻzgartiring:
   • Biznes rasmi — logotip. Rasm yuklash yoki Olib tashlash. U menyuda va kirish sahifasida koʻrinadi;
   • Biznes nomi;
   • Telefon;
   • Biznes turi — yoʻnalishlar. Yangi yoʻnalish tanlasangiz, "Saqlanganda qoʻshiladigan kategoriyalar" qatorida qaysi kategoriyalar qoʻshilishi koʻrinadi. Yoʻnalishni olib tashlasangiz, kategoriyalar oʻchmaydi.
3. Saqlash tugmasini bosing.

Sahifada Tarif (Bepul) va Obuna (Faol) qatorlari ham bor — ular faqat maʼlumot uchun, ularni oʻzgartirib boʻlmaydi.

Xodim kompaniya kartasini bossa, "Kompaniyani faqat egasi tahrirlaydi" xabarini koʻradi.

Xodimlar va rollar Faqat egasi

Ilovada ikkita rol bor: Egasi va Xodim. Siz qoʻshgan har bir odam Xodim boʻladi.

Xodim qoʻshish:

1. Menyu → Xodimlar → Xodim qoʻshish.
2. Ism, telefon raqam va Parol (kamida 6 belgi) ni kiriting.
3. Qoʻshish tugmasini bosing.

Xodim shu telefon raqam va parol bilan oʻz telefonidan kiradi. Parolni xodimga oʻzingiz aytasiz.

Xodimni oʻzgartirish. Roʻyxatdagi qatorni bosing — Xodimni tahrirlash oynasi ochiladi. Yangi parol berish uchun Yangi parol (ixtiyoriy) maydonini toʻldiring, soʻng Saqlash ni bosing.

Xodimni kirishdan toʻxtatish. Roʻyxatda xodim qatoridagi oʻtkazgich faol / oʻchirilgan holatni almashtiradi. oʻchirilgan xodim ilovaga kira olmaydi, lekin uning bergan ijaralari va qabul qilgan toʻlovlari tarixda qoladi. Oʻtkazgichni yana bosib uni qaytadan faollashtirish mumkin.

Xodimni butunlay oʻchirish. Faqat u hali birorta ijara yoki toʻlov bilan ishlamagan boʻlsa mumkin: Xodimni oʻchirish. Agar tarixi boʻlsa, ilova "Xodimda ijara tarixi bor — oʻchirish oʻrniga roʻyxatda oʻchirib qoʻying (faol emas)" deb eslatadi.

Egasining oʻzini oʻzgartirib yoki oʻchirib boʻlmaydi.

Maslahat

Xodim ketsa, uni oʻchirmang — oʻchirilgan holatga oʻtkazing. Shunda hisobotlarda uning ishi saqlanib qoladi.

Pastdagi menyu

Ilovaning pastki qismida tugmalar bor:

Tugma	Egasi	Xodim
Asosiy	ha	ha
Ijaraga berish	ha	ha
Qaytarish	ha	ha
Hisobotlar	ha	— (oʻrnida Taʼmir)
Menyu	ha	ha

Menyu ichida: Mahsulotlar, Mijozlar, Taʼmir, Kategoriyalar, Ustalar, Xodimlar, Yordam va Til. Kategoriyalar, Ustalar va Xodimlar faqat egasida koʻrinadi.

Asosiy ekran

Asosiy ekranda bugungi holat bir qarashda koʻrinadi.

• Katta koʻk tugma Ijaraga berish — yangi ijarani boshlaydi.
• Qaytarish va Hisobotlar (xodimda — Taʼmir) tez tugmalari.
• Hisoblagichlar: Bugun qaytariladi, Muddati oʻtgan, Umumiy qarz (faqat egasida), Taʼmirda.
• Muddati oʻtgan roʻyxati: qaytarish muddati oʻtgan ijaralar. Mijozga qoʻngʻiroq qilish uchun yashil tugmani bosing. Qatorni oʻngga surish — qoʻngʻiroq, chapga surish — SMS (telefoningizning SMS ilovasi tayyor matn bilan ochiladi, xabarni oʻzingiz yuborasiz).

Yangi biznesda Asosiy ekran "Ishni boshlaymiz" kartasini koʻrsatadi (faqat egasiga): avval Mahsulot qoʻshish, keyin Birinchi ijara.

Yordam

Bu qoʻllanma ilova ichida ham bor: Menyu → Yordam.